Алматыдағы автобус парктерін тексеру барысында 50 автобустан катализатордың жоқтығы анықталды. Бұл элемент шығарылған газды тазарту жүйесінің маңызды бөлігі болып саналады, деп хабарлайды Almaty.news ақпарат агенттігі.
Тексерілген автопаркте барлығы 289 автобус тіркелген, оның 40-ы жөндеуде тұр. Мамандар 249 көлік бірлігін тексеріп, 50 автобуста катализатордың жоқтығын анықтады.
Алматы әкімдігі баспасөз қызметінің мәліметінше, бұл мұндай бұзушылықтар анықталған алғашқы автопарк емес. Бұған дейін «NEO City TRANS» ЖШС және «TALAP T» ЖШС автобус парктерінде де өлшеу қорытындысы бойынша кейбір көліктерде шығарынды нормативтерінің асып кеткені тіркелген.
Еске салайық, Алматыда 2026 жылғы 28 сәуірден бастап шығарынды деңгейі төмен аймақ (LEZ) техникалық пилоттық жобасы іске қосылды. «Таза ауа» эксперименті келесі көшелердің квадратында жүргізіледі: Бөгенбай батыр көшесінің оңтүстігі, Абай даңғылының солтүстігі, Желтоқсан көшесінің шығысы және Достық даңғылының батысы.
Дереккөз: Zakon.kz