Биыл Алматыда көппәтерлі тұрғын үйлерді басқару органдарына шамамен 300 тексеру жүргізу, сондай-ақ тұрғын үйді күрделі жөндеу мен лифтілерді ауыстыруды жалғастыру жоспарлануда, деп хабарлайды Almaty.news ақпарат агенттігі.
Қалалық коммуналдық инфрақұрылым және тұрғын үй инспекциясы басқармасы басшысының орынбасары Жандос Қайырхановтың айтуынша, қалада 9,6 мыңға жуық көппәтерлі тұрғын үй бар. Оларға 2,5 мыңнан астам субъект — ОСИ, КСК және басқарушы компаниялар қызмет көрсетеді.
Өткен жылы 265 тексеру жүргізіліп, нәтижесінде 66 әкімшілік хаттама толтырылды. Жауапкершілікке 37 субъект тартылып, жалпы сомасы 10 млн теңгеден астам айыппұл салынды. Ағымдағы жылы 151 тексеру басталған.
— Тұрғындардың шағымдарының көбеюінің негізгі себептерінің бірі — тұрғын үй қорының тозуы. Негізгі факторларға уақтылы күрделі жөндеудің болмауы, құрылымдар мен инженерлік жүйелердің физикалық тозуы, сондай-ақ жинақталған пайдалану проблемалары жатады, — деді Жандос Қайырханов.
Сонымен қатар қалада ТКШ саласын жүйелі жаңғырту жалғасуда. 2011 жылдан 2025 жылға дейін 1 316 көппәтерлі тұрғын үйге күрделі жөндеу жүргізіліп (кіреберістер, инженерлік желілер, шатырлар және т.б.), 2 372 лифт ауыстырылды. 2026 жылы тағы 100 үйді жөндеу және 45 лифтіні ауыстыру жоспарланған.
Тұрғын үйді басқару саласындағы заңнамалық өзгерістерге ерекше назар аударылды. Атап айтқанда, «жай серіктестік» нысаны алынып тасталып, енді екі негізгі модель — ОСИ және тікелей бірлескен басқару қарастырылған. Сондай-ақ ОСИ төрағасының өкілеттік мерзімі үш жылға дейін ұзартылып, басқарушы компанияларды тарту мүмкіндіктері кеңейтілді.
Бұдан басқа, тұрғындар жиналысын өткізудің жаңа форматтары — күндізгі және сырттай (оның ішінде онлайн) енгізіліп, тұрғын үй инспекциясының функциялары үйлерді жылу маусымына дайындығы мен өртке қарсы жүйелердің жай-күйін бақылаумен толықтырылды.
Қолданыстағы КСК биылғы шілдеге дейін қайта тіркеуден өтуі керек. Ол үшін ХҚКО арқылы өтініш, жиналыс хаттамасы және тіркеу алымын төлеу туралы құжат тапсыру қажет. Белгіленген мерзімде талаптарды орындамаған жағдайда кооперативтерді мәжбүрлеп тарату рәсімі қарастырылған.
Сондай-ақ заңда уақытша басқарушы компаниялар тетігі қарастырылған — бұл жаңа үйлерге де, тұрғындары әлі басқару нысанын анықтамаған нысандарға да қатысты.
Дереккөз: Inform.kz