Алматыда Red Bull Four 2 Score турнирінің іріктеу кезеңі басталды. Бұл — қақпашысыз 4×4 форматтағы көше футболы, мұнда матч 10 минутқа созылады, ал алғашқы және соңғы минуттарда соғылған голдар екі еселенген ұпай әкеледі, деп хабарлайды Almaty.news ақпарат агенттігі.
Алматыдағы іріктеу кезеңі қатысушылар тарапынан үлкен қызығушылық тудырды: турнирге 100-ден астам команда тіркелді, оның 48-і жарысқа қатысты. Ойындар топтық форматта өтіп, кейін плей-офф кезеңіне ұласты.
Турнирге әуесқой командалармен қатар бұрынғы кәсіби футболшылар, футзалшылар және көше футболының өкілдері қатысты. Ерекше назар аудартқан — есту қабілеті нашар ойыншылардан құралған инклюзивті команданың қатысуы.
Кезең қорытындысы бойынша ұлттық финалға шығу үшін күресетін командалар анықталды. Ұлттық финалда Торонтодағы әлемдік финалға жолдама сарапқа салынады, ол тамыз айына жоспарланған. Жеңіске үміткерлер қатарында — 2025 жылы ұлттық кезеңде жеңіске жеткен «Сураншы-Батыр» командасы және бұрын Қазақстанды әлемдік аренада таныстырған «Картоп» командасы бар.
Алда Астана мен Ақтөбеде іріктеу кезеңдері өтеді, олардың қорытындысы бойынша үздік командалар ұлттық финалда кездеседі. Өткен маусымда қазақстандық команда әлемдік аренада сәтті өнер көрсетіп, 36 қатысушы елдің арасында бесінші орын алды.
Турнирдің Алматыда өтуі елімізде көше футболының танымалдылығы артып келе жатқанын және балама ойын форматтарына қызығушылықтың жоғары екенін көрсетеді. Red Bull Four 2 Score әртүрлі дайындық деңгейіндегі ойыншыларды біріктіріп, әрбір қатысушыға өзін көрсетуге және халықаралық жарыстарға жол ашуға мүмкіндік береді.
Дереккөз: Zakon.kz