Алматыда жалпықалалық сенбілік аясында тротуарларды жуғыш заттармен кешенді тазалау басталды. Жұмыстар ондаған нысанда техника мен жол қызметтерінің көмегімен жүргізілуде, деп хабарлайды Almaty.news ақпарат агенттігі.
Тазалау бірнеше кезеңнен тұрады. Алдымен тротуарлар су және арнайы ерітінді берілетін суару-жуу машиналарымен өңделеді — бұл кір мен көше жабындысын жұмсартуға мүмкіндік береді. Содан кейін жол жұмысшылары щеткаларды қолданып, плитканы механикалық тазалайды. Соңғы кезеңде беттер қайтадан таза сумен шайылып, көбік пен кір қалдықтары кетіріледі.
Ауқымды жұмыстар қаланың 23 учаскесінде ұйымдастырылған. Оған 48 бірлік суару-жуу техникасы және 480-ге жуық жұмысшы тартылған. Тазалау жүргіншілер көп жүретін негізгі көшелер мен даңғылдарды, оның ішінде Абай, Райымбек, Назарбаев, Панфилов, Сәтбаев және Гоголь көшелерін қамтиды.
Дереккөз: Inalmaty.kz