Алматыда үш адамның өліміне себеп болған жол апаты бойынша сот үкімі шықты. 33 жастағы кәсіпкер мас күйінде көлік жүргізіп, жол қозғалысы ережесін бұзғаны үшін кінәлі деп танылды, деп хабарлайды Almaty.news ақпарат агенттігі.
Қайғылы оқиға 21 наурызда Мендіқұлов көшесінің қиылысында болған. Zeekr автокөлігі қарсы жолаққа шығып, Mercedes-пен соқтығысқан. Соңғы көлікте болған 29 жастағы жүргізуші мен екі жас әйел оқиға орнында қаза тапты.
Тергеу мамыр айында аяқталып, 1 маусымда сот талқылауы басталды. Бір айға жуық уақыт бойы Алматы қылмыстық істер жөніндегі мамандандырылған ауданаралық соты дәлелдемелерді зерттеп, тараптарды тыңдады. Соңғы сөзінде айыпталушы зардап шеккендерден кешірім сұрап, ізгілікті шешім қабылдауды өтінді.
«Сот Паков Александр Олеговичті Қазақстан Республикасы Қылмыстық кодексінің 345-1-бабы 4-бөлігінде көзделген қылмыстық құқық бұзушылықты жасағаны үшін кінәлі деп таныды. Оған 10 жыл бас бостандығынан айыру және өмір бойы көлік жүргізу құқығынан айыру жазасы тағайындалды», — деп үкімді оқыды Алматы қылмыстық істер жөніндегі мамандандырылған ауданаралық сотының судьясы Еркін Майшинов.
Зардап шеккендердің көпшілігі айыпталушымен татуласып, нақты бас бостандығынан айыру жазасын қолданбауды сұраған. Алайда бір зардап шегуші қатаң жаза тағайындауды талап етті. Сондай-ақ сот айыпталушыдан 10 миллион теңге моральдық өтемақы өндірді.
«Біз үкімге қанағаттандық. Неге? Себебі сот ең жоғары жазаны қолданды — 10 жыл бас бостандығынан айыру және өмір бойы көлік жүргізу құқығынан айыру. 10 миллион теңге шығын — клиентіміздің пікірін білмеймін, егер ол қанағаттанбаса, апелляциялық сатыға шағымданамыз. Бірақ тәжірибе бойынша, мұндай істер бойынша 10 миллион — ең жоғары сома», — деді зардап шеккен тараптың адвокаты Мейірман Шекеев.
Сот анықтағандай, жүргізуші мас күйінде көлікке отырып, жылдамдықты едәуір асырып, қарсы жолаққа шыққан. Осы әрекеттер Mercedes-пен соқтығысуға әкелген. Ереженің өрескел бұзылуы, мас күйі және адам өлімі сияқты ауыр зардаптарды ескере отырып, сот ең қатаң жазаны тағайындады. Үкім әлі заңды күшіне енген жоқ.
Дереккөз: Almaty.tv