Алматыда зейнеткерлерге қатысты интернет-алаяқтық жасаған бір топ адамның әрекетіне тосқауыл қойылды. Жалпы залал 1,5 млрд теңгеден асты, деп хабарлайды Almaty.news ақпарат агенттігі.
Тергеу мәліметінше, күдіктілер өздерін құқық қорғау органдары мен қаржы ұйымдарының қызметкерлері ретінде таныстырған. Олар зейнеткерлерді адастырып, жылжымайтын мүлікті сатып, ақшаны бақыланатын шоттарға аударуға көндірген. Алаяқтық схемасынан келген жалпы залал 1,5 млрд теңгеден асқан.
Тергеу барысында қылмыстық топтың ұйымдастырушылары мен қатысушылары анықталып, ұсталды. Олардың әрекеттері ҚК 190-бабының 4-бөлігі бойынша сараланған. Сот қамауда ұстау түріндегі бұлтартпау шарасын санкциялады.
Қазіргі уақытта сотқа дейінгі тергеу жалғасуда. Қылмыстық әрекеттің барлық мән-жайын анықтау және ықтимал сыбайластарды анықтау бойынша іс-шаралар жүргізілуде.
Дереккөз: Inalmaty.kz