Алматы маңындағы трассада жол жабынынан шығып тұрған бетон кесегі бірнеше көлікті зақымдады. Instagram-дағы парақшалардың бірінде Бәйдібек би ауылына бұрылысқа жетпей тұрған «бетонка» учаскесінде жабыннан қауіпті түрде бетон сынығы шығып тұрғаны, оған жүргізушілер жылдамдықпен соғылып жатқаны айтылған, деп хабарлайды Almaty.news ақпарат агенттігі.
Видео авторы жол жиегіне тоқтауға мәжбүр болған көліктерді көрсеткен: Jetour кроссоверінің шинасы толық жарылып, дөңгелек дискісі зақымданған, Mercedes-Benz G-Class («Гелендваген») джипінің бензин багы тесілген, ал Hyundai седанының астыңғы жағынан бетон шығыңқысы коробканы тесіп, жерге май аққан. Барлығы осы учаскеде жол ақауы салдарынан беске жуық көлік тұрып қалған.
Автокөлік иелерінің айтуынша, олар «КазАвтоЖол» қызметкерлері мен 102 нөмірі бойынша полицияны шақыруға тырысқан, бірақ нәтиже болмаған.
Бүгін, 2026 жылғы 13 маусымда, «КазАвтоЖол» ҰК» АҚ «Алматы – Шелек – Хоргос» автожолының учаскесінде цементбетон жабынының жергілікті ақаулары жойылғанын мәлімдеді.
10 маусымда сағат 20:00 шамасында жабынның жекелеген плиталарында бетонның жергілікті бұзылуы орын алған. Алдын ала мәліметтер бойынша, бұған температураның өзгеруі және көлік жүктемелері, оның ішінде жүк көліктерінің әсері себеп болған. Ұлттық компанияда қазіргі уақытта барлық анықталған ақаулар жойылып, жол жабыны нормативтік күйге келтірілгені атап өтілді.
Жүргізушілерді уақытша жол белгілерінің талаптарын, жылдамдық режимін сақтауға және жөндеу жұмыстары жүргізіліп жатқан учаскелерде мұқият болуға шақырады.
Дереккөз: Zakon.kz