Алматыда тұрақ кеңістігін пайдалану ережелерін өзгерту ұсынылды, деп хабарлайды Almaty.news ақпарат агенттігі.
Қала әкімдігі «Ашық НҚА» порталында жарияланған қаулы жобасын талқылауға шығарды. Құжат жол жүрісін ұйымдастыру ережелерін қолданыстағы Жол жүрісі ережелерімен реттелмеген бөлігінде жаңартуды көздейді.
Жобаға сәйкес, ақылы тұрақтардың жанындағы үйлердің тұрғындарына тіркеу орнынан 500 метрге дейінгі радиуста тұрақ орындарын тегін пайдалану құқығы берілуі мүмкін.
Сонымен қатар, құжат көлік құралдарын эвакуациялау, оларды уақытша сақтау және қайтару тәртібін реттейді, сондай-ақ мамандандырылған тұрақтарға қойылатын талаптарды белгілейді.
Жеке блок жеке ұтқырлық құралдарына, оның ішінде самокаттарға арналған: оларды орналастыру, тұраққа қою және операторлармен өзара іс-қимыл ережелері анықталады.
Сондай-ақ жоба шлагбаумдар мен басқа да шектеу құрылымдарын орнатуды, автоматтандырылған бақылау жүйелерін енгізуді және интеллектуалды көлік жүйесін дамытуды реттеуді көздейді.
Бұған дейін жол жүрісін ұйымдастыру және жолаушылар көлігі басқармасының басшысы Ержан Диханбаев бастаманың механизмін түсіндірді. Оның айтуынша, тұрғындарға ақылы тұрақтарда жеке көліктерін тегін қоюға мүмкіндік беретін резиденттік абонементтер енгізу қарастырылуда. «Егер адам осы аудандағы пәтердің меншік иесі және автокөлік иесі болса, оған тегін тұрақ құқығы беріледі. Тұрғын үйді жалдаған жағдайда тіркеу және тұру фактісін растау қажет болады», — деді ол.
Дереккөз: Inform.kz