Алматы әкімдігі автобус паркін салу үшін Түрксіб ауданындағы үш жер телімін мәжбүрлеп иеліктен шығаруды бастады. Бұл туралы қала әкімдігінің қаулысында айтылған, деп хабарлайды Almaty.news ақпарат агенттігі.
Құжатқа сәйкес, Түрксіб ауданындағы 9-шағынауданда (әуежай) орналасқан жер телімдері мемлекет қажеттілігі үшін алынады. Коммерциялық кәсіпорынға тиесілі 9 гектарға жуық жер мәжбүрлеп иеліктен шығарылады. Мәжбүрлеп иеліктен шығару мерзімі – 2027 жылдың 31 желтоқсанына дейін.
Алматы қаласы Жер қатынастары басқармасының «Қала жер орталығы» коммуналдық мемлекеттік кәсіпорнына меншік иелерін заңнамада белгіленген тәртіппен хабардар ету тапсырылды.
Сондай-ақ, «Алматы қаласы Жер қатынастары басқармасы» КММ-не жер телімдерінің меншік иелеріне өтемақы төлеуді қамтамасыз ету және мәжбүрлеп иеліктен шығару іс-шаралары аяқталғаннан кейін жер телімдерін «Алматы қаласының жол қозғалысын және жолаушылар көлігін ұйымдастыру басқармасы» КММ-нің балансына беру міндеттелді.
Бұған дейін Алматыда Түрксіб ауданының «Қайрат» шағынауданында жол салу үшін 200-ге жуық жер телімі алынатыны хабарланған болатын.
Дереккөз: Zakon.kz