Алматыда екі құрылыс компаниясы мен екі жобалау ұйымы мемлекеттік лицензиясынан айырылды. Тағы 214 компанияның лицензиясы уақытша тоқтатылды, деп хабарлайды Almaty.news ақпарат агенттігі.
Қалалық құрылыс бақылау басқармасының мәліметінше, «ДО АО «КазНИИСА» ЖШС құрылыс лицензиясынан айырылды. Себебі компанияда міндетті өндірістік база болмаған.
Құрылыс нормаларын қайталап бұзғаны және бұрын берілген нұсқамаларды орындамағаны үшін «Сәулет Құрылыс Консалтингі» ЖШС де лицензиясынан айырылды. Бұған дейін компанияға қатысты бірнеше рет әкімшілік шара қолданылған.
Жобалау ұйымдарына келсек, «SK BEST Spec Story KZ» ЖШС I санатты жобалау лицензиясынан айырылды. Ал «Отау-Құрмет» ЖШС құрылыс нормаларына сәйкес келмегені және бекітілген жобалау шешімдерінен ауытқығаны үшін лицензиясынан айырылды.
Қала прокуратурасының ұсынуымен 214 құрылыс компаниясының лицензиясы тоқтатылды. Олардың біліктілік талаптарына сәйкес келмейтіні анықталған. Лицензияны қайта қалпына келтіру үшін компаниялар барлық бұзушылықтарды толық жоюы және талаптарға сәйкестігін растауы қажет, — делінген әкімдік хабарламасында.
Дереккөз: Nur.kz